打小報告

很久沒談近況
等我來打個（近況）小報告

親愛的友們
別擔心
我現在正忙著籌備那個乜屎爵士樂節
星期五就開鑼
每天都好不充實
每天都唔夠訓
所以憂傷的心情暫時擱置
大家一起加加油

阿彬仔又返左西班牙
所以我而家每日放工後就係自己同自己講下野咁
睇下書上下網快快趣又一天

跟同事們既關係越來越好
其實我公司係挺怪怪的我一直也沒有仔細說明
趁而家有心情不如來個公司人物小簡介

老細阿占
行將七十
脾氣暴躁
佢話你做錯野你千祈唔好出聲唔好解釋乜都唔好講
出去做返好佢就有你著數
唔發嬲個時係一個好人伯伯
鐘意你時你做錯野佢都笑騎騎
由一開始我覺得佢係憎我既
到近日我發現佢係越黎越鐘意我
原因係我呢排做錯野佢都笑笑口咁
唔知係咪中左獎

老細近身莎拉
二十多歲既內地女仔
唔
好複雜
同老細住埋
我唔想想像究竟係咪個種關係因為係唔係都唔關我事同埋我唔想知
大好人一個
但係有時好人得滯令人（多數係外國人）覺得佢好似當ｄ人係白痴咁
其實我好想知佢既理想係乜野
點解會同伯伯住埋
但係呢個世界人事好複雜
都係唔好多咀問咁屎多野

二老細阿添
三十多歲既佬
典型英國人再加點法國情懷
得閒醒兩句法文又叫你沖杯香港咖啡佢飲
係全公司ｄ英文最好聽同ｄ字最易睇既人物
我未見過佢發脾氣
我想像佢係一個好叻處理壓力既人
仲有我地全部人都好欣賞佢好亢奮地響個電話度大叫自己個名
仲有佢ｄ鬼馬鈴聲諸如扮牛仔講野同扮俾人捉左
同埋佢打哥爾夫成日打中ｄ牛

band友史提夫
好rock架個樣
仲岩岩去完glastonbury返黎大刺刺咁
成日遲到
果樣後後生生但係已經離過婚生過仔又結多次婚
會扮打功夫同話自己去過tai po
佢0係公司既話氣氛會好ｄ壓力會無咁大

小朋友屈數
真係好細個架咋得十九歲
但係佢係整個公司既靈魂人物
能人所不能知人所不知
果樣仲好似一隻熊bear bear
所以佢每日都係最多野做既
而每個人（多數都係我）有問題時都一定會搵佢求助
但係佢呢排俾阿占鬧得多
攪到short short地
我睇佢要放個大假補補先至掂

基本上我公司就係由呢幾個人物構成既
老實講我都唔係好知佢地老友唔老友
屈數咁細就無得好講啦
莎拉又係老細身邊既人亦都好難攪
佢地又唔一齊食飯
又唔覺眼佢地放工出去飲野
都唔知呢班人咁多年點樣一齊做野既
古古怪怪

返完呢份工
可能我個人都會變得怪怪地
但係又可能會幾失落
就係啦
一ｄ原本每日都見住既人sup一聲就唔見左
仲可能一世都唔會再見到
其實都好玄妙神奇

雖然公司小小人少少
但係處理人事關係都唔容易
可能好彩我只係一個過客
所以佢地都唔會對我好harsh
又我同佢地之間既關係都可以好簡單好直接
唔會驚今日呢個笑話第日佢會記住
而人咁少都依然係有好多唔妥唔like唔0岩key咁
真係大開眼界

 

今天靜靜地走進了彬仔的房間
在那張椅子上坐了一回
沒有牽腸掛肚
但卻感到十分安然
像親人
像朋友

我希望有一種愛情是如此輕描淡寫卻非可有可無

 

願天下各位繼續當春情暴發戶
總好過等呀等得發mung睜