一言驚醒

上課後有感

剛才那個課
有位英國巨型出版社頭頭來跟我們講野
整件事都好和平好資料豐富地進行
最後黎多個驚喜
就係頭頭帶左幾本就黎出但係未出既書送俾我地
咁當然就係要答下問題咁就有書送啦

書就得幾本
同學A由於一早已表明想從事出版業而十分積極參與討論
所以佢就可以第一個揀書
好合理

大家陸陸續續答下問題拎下書咁
好快就去到最後一本啦bor
頭頭話最後一條問題梗係送架啦
咁佢問
黎緊邊本書0係英國肯定銷量第一呢?
咁相信唔洗諗都知係個位哈利生啦
於是自然多過一個人會大叫左個答案出黎
而咁0岩大叫答案既同學A同B都已經有書啦bor
頭頭就同B講：咁你拎多本啦
阿B話：阿A都有份答既
頭頭話：啊，咁你有風度，讓俾女仔啦
阿B笑笑口同阿A講：哈哈，我地都有書啦，或者你可以俾個機會其他人揀一本？

阿A亦笑笑口咁話：Why should I????

頭頭笑笑口咁話：oh, I like her character.

 

係lor
就係一句why should I
真係令我從沉睡中扎醒！

如今都只係一本書姐
都要有呢種「係我應得既點解要俾少少機會你呀有無攪錯呀」既態度
先能夠得到職場頭頭既賞識
相信我呢種人都係只能當個小文員被人剝削下混混下咁過日子
唔係話我自己唔自私
只不過有時混混下就真係未諗why should I就已經分哂D野俾人啦嘛
why should I呢種咁既思維真係無植入我個腦袋裡面bor

 

相信愛書人當出版
一定會是很痛苦的經驗
你愛的東西你想跟多一點人分享
但最後卻落得只有那些問「點解我要同你分」既人才能在工業裡存活被頭頭賞識升職加人工話哂事

 

哈哈
臨完場既小happy ending係
我都答左條問題拎左本書走