今天係年初四呢，好鐘意農曆年這東西，好似好多野都可以重新計算過咁樣。
年初四同時標誌著一件好重要的事，就係我爸媽一年僅一次的假期放完了。怡香園明天啟市，我們又再上路。由我懂事以來的每一個農曆年都是如此。
呢幾日，唔係無野好寫，而係真的十分戀家戀家人，所以心神無辦法放在網路上。而家一次過順序寫返出來，別人覺得是流水帳，我的流水生活流水事，別人難懂。
年廿九又即係年三十晚，溫馨家庭生活的開始，黃昏六點左右爸媽提早收鋪同我地去花市行行走走開心下。雖然天雨路滑，但係感覺良好。我地有時係三二westlife陣式，有時係五人行成條路，可想而知花市迫人極有限。最終買左支吹氣「雄圖大剪」，新一年實有運行。
夜晚幫媽媽入利是，放全盒，雖然無人會黎拜年，但係個全盒放在屋中間，好好feel。仲有一束媽咪之前在花墟托返黎既靚花（乜都有ｄ），同埋一盤吉，然後同爸爸合力幫手摺元寶，我地摺個ｄ好多時即刻彈返開，手工麻麻地。
年初一一起身，超開心，或多或少都係一種覺得自己應該要開心既狀態，換上個件新買既紅色衫，係架，其實我個人好傳統好老土無乜特別，但係紅當當又真係令我心情好好。收爸爸媽媽利是，係尋晚我幫手入利是個時話最靚既個封利是（係架，有好多唔同款），講左少少甜言蜜語，一年既好開始。
跟手去爺爺度拜年，同大夥兒一齊去華富酒樓飲茶，同姑姐傾左好多計，如果我３０歲個時都好似佢咁都幾好，又young又玩得又有男朋友錫又係萬人迷。上返去爺爺度，話走話走，結果都係睇埋隻《fantastic four神奇4俠》先走，十個人一齊睇一隻碟，好神奇。
全日既highlight黎啦！就係舉家暢遊香港公園！老實說，香港公園呢個地方，我超鐘意，記憶所及都係同最親愛既人遊呢個地方。我地一齊去睇溫室，一齊影好多相好似遊客，一齊在圓形廣場野餐，一齊四圍行，完全係同我想像中既家庭生活一百巴仙吻合！其實我地全家有幾耐無一齊影相，要數要算的話的確可以令人難堪，但係我珍惜既野從來無變過，特別係去年細佬整親入院後，我更變得小心翼翼將每一點時刻都小心輕放。（相機條cable唔見左，遲ｄupload精華相俾大家看看）
回家後都係食下飯休下息睇下電視咁，全家一齊睇左無線的《行運超人》。
初二呢，又回到了華富村，一個我長大的地方，我估嚴格黎講我都可以算係一個屋村妹。探望了成年幾兩年無見過的黃媽媽，就係以前在華富村湊大我的那個婆婆。以前爸媽在華富做個時，仲忙過而家，一朝早就放我在黃媽媽個度，然後到晚上先接我走。聽落又有ｄ似以前個ｄ好煽情既故事，但係真係的，父母與子女相處的時間並唔係必然。見返黃媽媽，見返華珍樓，真係覺得原來做人可以咁樣就一世的。
返到屋企，怒睇左《brother grimm 格林兄弟幻險記》、《perhaps love 如果．愛》、《corpse bride 怪誕屍新娘》及《the island 謊島叛變》。一大班屋企人一齊睇碟既經驗好難忘，就好似一齊燒野食或者一齊打邊爐咁，一齊起勢圍住同一樣野，好似大家都會捉得住一ｄ野咁。
初三有一點點怪怪的，同赤口無關，因為媽媽要上大陸拜神，一早我們去了飲茶，跟住媽媽就起行。百無聊賴的我們，為了不胡思亂想，所以去了看戲。我們睇左《the chronicles of narnia: the lion, the witch and the wardrobe 魔幻王國：獅子、女巫、魔衣櫥》（個名長到．．．）同埋《春田花花同學會》，跟住夜晚出了香港仔食飯。夜深的時候，我有點悲涼的感覺，好像在這一天家裡人少了一個心頭就少了一塊肉似的。其實我知道我無唔開心，不過就發現多左「完整性」原來對我黎講係好重要的一件事。
年初四即係今日，上午細佬出左去學琴阿妹去左同學仔屋企，爸爸出左去同爺爺飲茶，我唯有睇《大學群英越野狂奔》、《九五至尊》等。下午爸爸都要出返鋪頭準備明天開鋪的東西，所以我又睇多左一次《orange days》。簡直係law黎衰既一種活動。
yeah！媽咪返左黎，仲帶左ｄ簽返黎，我一個箭步飛過去睇下我ｄ簽，求姻緣個支簽叫做「大破少林寺」，第一句係「風停浪靜好行船」，經我同細佬研究後認為「大破少林寺」即係有得睇無得食，少林寺內皆和尚，而「風停浪靜好行船」則有兩個意思，其一為風停浪靜乜都無，其二為行船間無風無浪即係好野啦，講完。
我知上面好悶啦，唔想睇哂可以重點睇下每段頭同尾lor，即係好似個ｄ閱讀理解咁lor。
睇左咁多部戲，好明顯全部都係ｄ「家庭假期」式既電影，無他既，放假同家人一齊，都係想開開心心嘈嘈下咁。平時睇個ｄ「奇怪戲」（張鴻驥，2005），都係一個人睇，其實，我都係一個鐘意嘈下開心下同多ｄ人一齊既人姐。我真係騙不過人啦，做唔到個ｄ風骨既文人。
我又發現我真係越來越戀家。唔知係咪人大左，開始一年一年咁數算著，好似ｄ時間特別珍貴。記得中學個時，有一陣子好唔鐘意屋企，好唔鐘意爸媽細佬妹，覺得屋企裡面無一樣野係明自己既咁。那一陣子的自己，簡直就係全世界既中心點，然後最好就叫埋個太陽月亮圍住我轉。可能我不能說我討厭那時的自己，因為都無乜好討厭唔討厭的，過了就是過了。呢幾年唔知算唔算好多經歷，但係每一樣經歷都比以往更用心的記住了，所以對身邊人真的很珍惜。前所未有咁珍惜架。
然後又好想再一次讚下爸爸媽媽。一年得４日假，真係唔係人人頂得住，當然身為家人既我都好勁，咁都頂得住。我開始覺得我真係好似阿爸既性格，比較婆媽，比較長氣，比較易抑鬱，比較情緒起落大，但我可是很祟拜他的。有樣幾有趣的東西可以睇睇：
呢張係爸爸既成績單，我拿在手，覺得比任何一張自己的成績單更重。當時如果佢唔係退學落左黎香港，而家我是否還存在？呢ｄ問題看似很existentialist，其實都只不過是我心裡有一絲難過的掩飾。有時候，我們都很想補償一些我們所不能得到的東西給別人，我們的爸媽也是。
我又覺得媽媽係超人，仲勁過麥太，點解可以將所有東西都湊拚得如此妥貼？打理家務出鋪頭做野照顧我們照顧埋阿爸ｄ情緒超努力拜神得閒仲可以整ｄ新野食八ｄ新資訊返黎同埋講少少笑話，我知道如果第日我有機會做媽媽的話，一定及不上張太，然後我的仔女都會超喜歡這個婆婆。
這篇entry超婆媽，又ｘ唔斷氣（新年流流唔講那個字的），但係我打既時候，嘴角都忍唔住微微戚起，我本身已經小丑嘴，而家係加劇左既小丑嘴，但係我覺得很溫心。
註：《橘色日子》又一次令我的心情很lup痴痴，又再一次嚮往在我而言已不復存在又所餘無幾的大學生涯，人生又那得幾回年少輕狂。然後又好像看見《春田花花》裡的大學畢業生一起衝出去搵份工食餐晏仔既場景。
其實我們都只是傻傻下又一天，un un腳又過活，fing fing下就happy既小豬。
我想多謝由頭睇到尾的人。
一座塔
塔內
有字的香
.........we can only say that we underestimate the power of Justin....=p
