在歧路上，我們高呼尊嚴還是幸福。

然，沒有了尊嚴，甚麼才算是幸福。

忽然發現呢排睇親乜都話人地型。

好明顯係人地真係型。

唔該，《NANA 世上的另一個我》，好睇到嘔，中島美嘉無可能型成咁。

奈奈全身濕哂失魂落魄咁返屋企，冷不防中島美嘉咀對咀錫左佢一啖，的確係佢地兩個關係既展現的一絕！仲有奈奈失戀縮在被窩喊，美嘉粒聲唔出就訓在佢隔離輕輕攬著佢，真係太．正．了～

點解無個中島美嘉咁既女仔在附近？

佢唱Glamorous sky個一場，絕讚！我唔expect佢真係咁rock得起，燈一亮個下，全黑西裝褸上的一朵大紅絲帶玫瑰，glam爆！首歌真係勁出！

兩個女孩，世上的另一個我。拒絕孤獨。

世上的另一個我的人生。

 

註：同琪姐進入瘋狂狀態，並多謝佢尋晚陪我鬥個thesis題目出來。

正在苦思thesis的proposal當中。

原本諗住十分不自量力地做gender/feminine writing，最慘係我根本完全無底，得個諗字。十分多謝彭家維同學陪我諗左咁耐，仲借埋個account既reference俾我　我諗我都係唔係gender人黎架啦（你早都係咁話）～

又，陪左家維牛牛陳淑華（牛代表）及cerys去領畢業袍，yee，文學院既米黃色好易污糟呀，條條都好　佢地12月8號就畢業典禮啦～見到佢地ｄconnection仲keep得咁好真係好眼紅添。

我好快都會拎袍LU~~~~~

尋晚半夜訓唔著，起身睇左《Fight club 搏擊會》，wah，好睇到震，拳拳到肉，同埋估唔到劇情最尾係咁，d editing真係好型，好似成日帶住我游黎游去咁。

edward norton超型，當然brad pitt係好傳統個隻型，但係唔夠edward norton咁正，超addicted look，病態到不能，個人好似每一秒都會collapse咁，性格又歇斯底里到盡，個對黑眼圈間直係可以捲起風潮！好一句「I cant sleep」，直情令我對失眠有一種變態的嚮往！

能夠媲美的相信只有《trainspotting》中的ewan mcgreggor。

《fight club》一定要睇，除左型之外個故事真係好正，對於我地呢ｄ就快要面對現實進入社會既人黎講，真係一次放到盡既自虐！又或者個ｄ覺得自己好正常好滿足現狀既人，睇完可能會有ｄ野。

 

同埋好想講一句「仇智德加油~」

 

我thesis好想做董啟章，希望諗到點做，by 今晚。

發現我的日記，有ｄ怪怪地，好似同以前唔同左好多。

有時候，好像很不能於人前揭露自己似的。又有時候，揭露了出來的，也許只是拼圖的一兩片而已。而呢副拼圖甚至不是我的。

只是當這個擬真的世界越來越真實的時候，我又為什麼需要它了？真實是因為它越來越假。

文字反映心性。但當語言越來越複雜混亂時，我撫心自問。我認為我寫的東西越來越假，滿足不了自己，強裝成一些連自己都不明暸的東西。

我覺得還是歇斯底里一點好。

將會很忙，但現在仍在hea中。

頭先睇左無線播的《spider man》，好睇。kirsten dunst個酒窩令我好想meet下佢塊面，而點解佢而家可以咁瘦呢？

呢ｄ咁既大片其實都真係幾好睇的，娛樂性豐富啊～　對上一齣有呢個感覺的應該係《van helsing 狙魔人》，喂，真係幾好睇的，男主角hugh jackman勁型！

剛睇完杜琪峰頗早期的一部作品《鎗火》，好睇到震。能夠將一部黑社會動作片拍得如此靜態而又不悶而又令人很緊張，的確好強。呢部戲之後杜琪峰拍左一堆《孤男寡女》呀之類的戲，其實真係幾費解。（我本身都覺得《孤男寡女》係好睇的，只係唔明杜琪峰點解可以分裂得咁緊要）

《鎗火》可以算係杜生拍男性情誼及無劇情既開山之作，真係好劇力萬鈞呀（對我黎講，有張力既意思大概係我對眼離開不了個銀幕，十分簡單）！特別係商場保護大佬同於草叢與狙擊手對峙兩幕，很風格化型到震！

好鐘意睇呢ｄ咁既男人戲，好鬼唔realistic，正。

 

好慘，尋日在UC lib睇到一半的《pulp fiction》，john travolta與uma thurman的舞姿仍在我心中迴盪久久不散。相信係好睇過《kill bill》的。

應承左pumbaa，我要記低佢個新名：喜樂(起落)活力小跳豆。

你早：coen brothers 1984年第一套戲，但到左1996年先至在oscar拿獎，就係你講個套《fargo 雪花高離奇命案》

會長：你當局者迷姐，呵～

yee，好耐無寫，因為懶。

快速記事：

睇左四院劇賽既shaw同chung chi，shaw好睇好touched對劇場空間有d思考，崇劇ｄ衫好靚歌好聽。

上堂睇左the coen brothers既一d戲，包括《raising the arizonas》（超級有趣的瘋狂喜劇，nicolas cage好生鬼，1987年的戲）及《barton fink》（未睇哂，但又係一套有點黑色幽默的戲，幽劇作家一默的戲）及《miller crossing》（好似會幾好睇，有ｄgodfather + goodfellas feel）及《fargo》的一小段。這對兄弟真是活寶。

與陳嘉媛吃午飯，吹了一桌水，很勁。漫遊旺角。多謝她的生日禮物。

同會長慶生。錯將灣仔grand hyatt當作尖咀hyatt，由surprise會長變成surprise我本人。新港機鋪巧遇吾弟，驚鴻一瞥驚覺他為當代舞王，型到震（如實紀錄），會長更認為吾弟與光良有七分相似（只為當晚打扮適用），芳心蕩漾，無視與吾弟六年光陰既差距，展開鋪天蓋地式的追求（我估遲早會）。當晚我們更於星光大道漫步，好不浪漫，我們身為肥椰青（肥胖的夜蒲青年）及肥邊青（肥胖的邊緣青年），施展混身解數，最終，會長成功引來三名食煙但型的男子前來祝壽。會長兩眼放光。事情終告一段落。

第二日完全不省人事，走了腸仔的堂，內心內疚得非常。

看了《goodfellas 盜亦有道》，真的是盜亦有道嗎？唔通個「道」係指有系統？睇真ｄ套戲描述到黑社會都有system有宗族，所有野都有規有矩，但突然間個套「規矩」又可以因為一條友發癲而瓦解左。總之就要當權啦，唔係就死得好慘。

無所事事。

睇多左一次無線重播的《逃學威龍３之龍過雞年》，唔知點解，除左覺得好笑之外，我好似對無記於星期日重播既電影都有ｄ情意結，如果唔係一件垃圾，我多數都會睇。

睇埋重播劇集《婚前昏後》同《再見亦是老婆》，好睇。唔該無線而家夜晚個ｄ劇集收皮（《刑偵》除外）。

讀緊朱天文的《荒人手記》，原來係講queer的，我真係無知。讀得好慢，因為她的這部手記很「手記」很後現代很難消化很難理解甚至有點過份。

夜晚面見牛牛一起吃飯，講講講講左好耐。好掛住他。

剛發現了amazon.com出了一個penguin classic的whole collection。

無錯，係whole collection，直至2005年，總共有1082 titles的作品，超過750磅，價錢係大概$64,000港幣。

"all great works of literature totaling nearly half a million pages."

有興趣去看看個list，淨係望下，都經已達到高潮既感覺。

 

如果他日我有咁既能力，一定會儲返set。

不為甚麼，只係想high下。

對不起，我又係週期性問題，讓大家瞎擔心了。

反正我而家的生活就是好得非常，不能再好了的。

但係我估kasmine係估得對的，你可以打俾我check下answer

昨晚睇左《藝行四方》，好想可以去多次（應該係好多次）edinburgh既fringe festival！仲要去住民宿３個禮拜！勁行市集！勁講英文（british+scottish accent的）！勁吸個度ｄ空氣！

回想起在2002的summer，我仲未係好知fringe有幾巴閉，但都胡里胡塗睇左兩套theatre，又睇左個巡遊，又去左ｄ攤位度玩，又買左件加大大大大碼既tee，我真係好好彩呀！

這是今年fringe的一個表演節目的宣傳

我覺得cathay pacific新既廣告真係好買得中而家呢一代人：我地天生有顆躍動既心！如果可以既話，真係好想時時去旅行（我既ultimate一定係歐洲！）！面對完現實又逃避下現實又再面對返現實，呢個process係最令我滿意的。

 

又，下面這個女孩子真的太可愛了～

60年代的model Twiggy

真的很mod啊

最終我還是得承認，是很失落的

無論過了多久

昨晚看了《最好的時光 three times》，很侯孝賢吧應該（我唔係睇左好多，唔敢咁講）。

最喜歡〈戀愛夢〉，那個阿兵哥，那個桌球小姐，那首smoke gets in your eyes，那個下雨的夜，那些撞球，那艘無光的船，那個桌球小姐的行李箱，那對阿兵哥的黑白布鞋，那個桌球小姐的束腰白襯衣花布裙，那個阿兵哥的一頭剷光了的髮。

那個舒琪，那個張震。

戀愛就是這麼簡單的，最好的，時光。

 

莫怪乎人們說侯大導這部作品充滿自己的影子。那是海上花和千禧曼波吧。重覆不重覆也許不是問題，最重要是靈魂啊。〈戀愛夢〉給了我它的靈魂。

 

今日去演藝聽左個亞洲文化合作論壇的presentation，有陳可辛，一個韓國導演（好似係業界主席），一個律師，一個CEO。

都係D好浮面既討論啦，總之大方向就係要利用CEPA，向中國十二億同胞市場進發，同埋要進行多d Asia co-production。

最大得益係見識到陳可辛流利到極既英文，拎左兩本香港電影金像獎特刊，知道左少少CEPA對電影業放寬左D乜野，同在演藝拎左一Ｄ brochure。

 

yeah！買了董啟章的最新長篇小說《天工開物．栩栩如真》，呢部佢自稱為自然史三部曲既首部，長達五百頁。

真係好貴啊，成一百大元，如今能令我如此掏錢出黎買既作家，真係無幾多個。

極度多謝琪姊姊送我的禮物：《一次 --- 影像和故事  Einmal-Bilder und Geshichten》by Wim Wenders

愛到不能再愛多一點

他說：

「每張照片讓人驚奇的地方，
並不是通常人們所認為的
『時間定格』，
恰恰相反，
每張照片都重新證明
時間的綿延連續
不可停留。
每張照片都是對我們生命必會消逝的提醒。
每張照片都關乎生和死。

每張照片，
存在於時間裡的每個『一次』，
都是一個故事的開始，
總是以『從前有一次』開場。
每張照片也可以是一部電影的第一個鏡頭。」

 

看吧，讓影像代我們說話。

我們的一次。

熱烈地想睇呢幾套：

會唔會係靚左少少？

 

又發現左原來《sophie scholl》既女主角就係《die fetten jahre sind vorbei》(即係《大教育家》)既女主角julia jentsch

記低先：

睇左

《the shining 閃靈》（晨早流流在電影課裡看的，睇到我全身發冷好急尿）

《Lord of the Rings 三部曲》（我同佢地一齊長征）

《vertigo 迷魂記》（好睇！希洽閣真係勁！）

聽左

《還是會寂寞》《the groupies》《華麗的冒險》《楊千嬅紫色個隻碟》《the invisible band》《pablo honey》《2046: soundtrack》《forever sunshine of the spotless mind: soundtrack》

為表誠意，我打一篇entry覆大家的留言。

劉A：因為你誤會左我既意思，所以覆左你先，我意思絕對不是我唔感動，係完全相反，可能我上面鋪陳得太衰，致使你誤會左我。我係感動得全身起雞皮咁滯（你知只有真正的感動先會咁啦），而我意思係當呢個世界上好似只會存在物質性既stimulation之時，仍然有你地肯咁花心思去為我surprise下，十分感激！

karen lau：一定要添呀！唔止生日要celebrate，連平日閒日都要celebrate，借ｄyee見下面！

餅：你都知要健健康康哩？我許左願架啦，身邊既朋友一定會身體健康的，你唔好病呀，唔係我個願望就唔靈！

Amy：呵呵呵，唔知哩～

蛋糕小姐：大家咁話，仲要靠你幫我地打ｄ好碟同揀ｄ好蛋糕！

魚：梗係記得你啦！你係發水麵ｘ呀嘛　好多謝你呀，仲記住我生日～我都記得你架，july 6th呀嘛~~ 你幾時會返黎海怡呀？等你一齊去長堤散步！

俏秘書：你．．．唔好太囂張！雖然收到你張卡我感動到死，但係唔代表你可以唔同我終老！

彭家維：我知你同你早都很有心，錫哂你～

 

現在要寫一個超級感恩日記，因為今日雖然老了一歲，心情上理應有ｄ覺得yim悶（距離嚴重老化又近多一步），但我覺得我這個無聊人得到了太多太多，實在係幸運得好想大聲拍手掌！

一．多謝浪哥哥，真的很感動，日本寄來的心意。中左佢既詭計，忍不住哭了

二．多謝會長、DJ Cake Carmen、彭彭、劉A尋晚的surprise，這個年頭，stimulation太多，感動太少，苦了你們苦心經營為的只是令我這個傻瓜興奮感動。你們與我共渡良宵，見證住我又同你地拉返大一年既距離。尋晚既通Ｋ令我重拾年輕少女既魄力，我們瘋癲到底，RED box吹我地唔脹。

三．多謝俏秘書既越洋message，說得對，佢地俾左我好大的驚喜，原來中同們的cohesion真的很強大，心思真的很細密，我好想同大家一齊終老。

四．多謝Amy同Sandra同我食左一餐飯／甜品，大家都係天蠍，大家都要有目標。特別多謝Sandra揀的蛋糕，麵包包住蛋糕，好似暗示左一ｄ做人既新態度咁（應該又係我亂諗野）；亦好多謝Amy的那個小禮物，那東西本來應該係可以咬的，但而家在我手裡的又不能咬，好矛盾的人生。

五．多謝牛爸牛媽及你組（早）仔，一起吃飯，一起去科學館玩，一起看《一球成名GOAL!》，無以為報，特別多謝牛爸媽既生日禮物～

六．多謝彭家維既垃圾桶裡的糖果（and花and靚簿），Unexpected的快樂。

七．多謝十二時正打俾我的張鴻驥。家姐又老左一歲，你又大了一點，心情很複雜，但亦很甜。

八．多謝所有send message給我既好朋友們，多謝你地心裡面有一個小小的角落留俾我（我唔會識穿你地係要多謝ICQ birthday alert既）。

九．多謝所有留過言在我既previous xanga entry的人，你們同時陪我過左舊曆生日，萬歲。

十．多謝琪姊姊為了我大費周章，期待你的禮物。

十一．多謝所有呢一刻睇到呢到，又有諗過一秒「張燕屏原來今日生日」既人。

十二．多謝多一次我的家人（當然包埋那班五星級迫爆的你們），無你地，無22年的我。亦無而家。

懷住感恩既心情，過今天，過以後每一天，好似載滿左幸福咁。

我再講多ｄ呢，我諗會有人以為我信左教。但係其實信教都幾好。

大一歲，對我黎講即係新一年，我今次生日只有短期小願望，希望一年內實現的瑣碎事，然後下年再接再厲。願望包括：

繼續感情用事（我覺得這對我來說是好的）、好努力讀最後一年書、身邊的人完好無缺身心健康快樂、用盡學生優惠睇戲睇劇去博物館、搵到感情依靠（這是很實際的，我唔會扮野的）、同鍾意的人去科學館玩。記住係短期目標啊，一年吧。

其實ｄ願望唔大唔細，好似我個人咁。

我希望我既人生係一粒不倒既小酒塞（尋晚我地飲個支香檳個粒），我推它，有時會倒下，有時不會，最後我又會重新扶起它，繼續同佢玩。打不死就最好！

多謝爸爸媽媽既tiramisu蛋糕。

多謝舊曆生日。

多謝彭家維早到既生日快樂。

多謝琪姊。

多謝你早的口述禮物。

多謝細佬細妹教我玩個樣野但係最終我都係玩唔識。

 

我覺得我好想咬一個人一大啖。

昨日與琪姊睇左《黑社會 election》，蠻不錯啦，一貫的masculine及過度美化的男性世界lor。

任達華cool and 型係意料中事，其實都無甚驚喜（雖然最尾個下的確嚇窒左）；古天樂、林家棟、林雪、張家輝、張兆輝，下集的鋪陳；而林家棟有強烈的無間道味，古天樂則是柔道龍虎榜味。

再諗真ｄ，上面個堆人，有少少似睇緊無線劇集。

我係幾鐘意睇香港的警察片同黑社會戲的，姑勿論當中包含左幾多浪漫化及我地呢d乜都唔知連黑社會條尾都未見過既人既幻想，但係個種男男世界兄弟行先既盟誓的確係睇到人血脈擴張的。

好一句「愛兄弟，還是愛黃金」。其實諗都諗到答案係乜啦。

我還是覺得英文片名比較有趣，《election》，黑社會的制度及秩序，一板一眼的龐然大物。是否最終極的傾覆？

ｄ打燈真係無話可說。

我都係最鐘意《柔道龍虎榜》。throw down，get up。就是這樣。

 

前天上陶生課，講到matrix，好深，好深，好深。電腦世界要debug就整左neo出黎，咁人類世界要debug可以點做？

在學校寫xanga，還是頭一次。

這幾天做左ｄ乜呢？平心而論，唔多記得。

買左《無間道1,2,3》，終於用左6小時無間斷地睇左佢。

被遺忘的時光，倪永孝，Mary 姐，楊錦榮。

有好多口號式的對白：「做女人好簡單，只要個男人好，我做咩都得。」

「個世界唔應該係咁，做人都唔應該係咁。」

「我想做好人。」

晚上去睇左拉丁藝術節既另一個節目：《事先張揚的求愛事件 The Postman》,講述一位智利既詩人兼政治家Pablo Neruda既事跡。

現場既拉丁結他配樂，真係令人好似置身呢個純樸既智利小島黑島之上，縱使ｄ演員係講緊中文。

整個話劇既narrative手法非常簡單，讓人回歸說故事及聽故事既本源，亦好似表現出呢個小島既簡單、熱情、直接既氣息，我很喜歡這樣子。手法是寫實的，感覺卻很浪漫。

聽左少少Neruda既詩歌，真係覺得佢係一個很有人文關懷同很熱情率性既人，而佢亦係1971年諾貝爾文學獎既得主，同時又參政。文學情懷與政治識見既結合，一位充滿睿智既老者。

特別鐘意劇中既配樂，由Beatles既《Please Mr Postman》到Rina Ketty既《J'attendrai》到好正，愛死佢ｄsound design！

老者說：「整個世界就係一個好龐大既偶然。」